خدمت خاقانه كلورلر خدام با احترامدن اوچبيك دختران سعادت اخترلردن اوچييك هركون نوبت ايله خاقان چين صحبتنده مشرف اولورلر و بعضى قزلركه خاقانك بابالرينك خدمتنده اولمشلردر و انواع رعايت ايله سراى خاقانيده قالمشلردر قانونلرى اوزره درت بش ييلده بركره خاقان ايچون ولايت چينده باكره و پاكيزه قزلر جمعى ايچون خادملر ايله كشت و كزار ايدرك خاقانه لايق حور امثال عذر الردن بولدقلرنده غايت تعظيملرندن محفه‌لره اصناف زينت ايله تحميل ايدوب شهر به شهر منزل به منزل انواع عزت و حرمتله خاقانك سراينه كتوروب خاقانك والده سنه يا همشيره و حاله‌سنه تسليم ايدرلر بعده يكان يكان اول پرى پيكر چشم جادو و هلال ابرو نازنين قزلرى عرض ايدرلر و طبقه‌لر نجه تزيين ايدوب قابليتلرينه كوره ترقى اولنوب رعايت اولنور و بو منوال اوزره استخدام اولنور و انلرك ايچنده مقبول اولميان قزلرى اول سرايده پير اولان خاتونلره بخشش و انعام و احسان اولنوب انلردخى مكانلرينه كوندرلر بيت هر شب به منزل و هر شب جائى * چون زورق اشكسته بدريائى و اول سرايده اولان خدام با احترامك جمله‌سى مالك حسن و جمالدر و خادملره اولان رعايت و سائر خلقه اولمز بو جهتدن اهالى بلده غايتده جمال و با كمال اوزره اولان اقربا و اولادلرينى رياست خاطريچون حين طفوليتلرنده خاقانه خادم ايدرلر و بونك كبى امره شروع ايتمك مراد ايتسه‌لر قانونلرى بودر كه شهرلرنده اولان بكلرينه واروب اولاد و اقربالرينى عرض ايدر و اندن اجازتنامه الوب خادم اوله حق كمسنك الات رحوليتنى قطع و طواشى ايدوب معالجه و تيمار ايدرك صحت بولدقده شهرلرينك اميرى اجازتنامه‌لريله خاقان سعادتشعارك پاى تختنه واروب سرايده سردار اولان خادمك اذنيله امرلرينى اولادلريله خاقانه عرض ايدرلر بعده اول كمسه نيجه مدت سراى بيرونده اولنلره خدمت ايدوب كماليله درون سرايده اولان اغالره كسب استحقاق ايلدكده ايكنجى سرايه داخل اولوب انده دخى نيجه مدت خدمت ايلدكده اول خادملردن كمال امانت و ديانتلو و زياده زكاوت و متانتلو بر خادم مرقومى تخت تربيه سنه الوب نيجه مدت قواعد و قانون و احوال ضبط مملكت و جميع امور سلطنت معلوم اوليجق طبقهء اوليده برينك محلى محلول اولدقده انك يرينه نصب اولنوب بعده زكاوت و خدمتى مقابله سنده تدريج ايله ترقى بولور و هر طبقه نك مراتبى و معين كارىوار در فصل ايج سرايده اولان طبقهء اولك خادملرى باغلرك و بستانلرك پرورشى و سائر امورى خدمتنده